Benni er alltaf spenntur þegar það er stutt í nýtt tímabil
„Já, við erum búin að koma okkur fyrir og erum að elska lífið á Króknum. Við erum einnig búin að vera mikið á ferðinnni að ferja dót og eigum eftir að ná í meira dót – okkur líður rosalega vel hérna,“ segir Benedikt R. Guðmundsson, þjálfari Tindastóls í körfunni, þegar Feykir spurði hann hvort hann væri búinn að koma sér fyrir á Króknum. Nú styttist í alvöruna en fyrsti æfingaleikur haustsins er annað kvöld í Síkinu og því rétt að athuga með þrýstinginn hjá þjálfaranum.
Það eru Þórsarar frá Þorlákshöfn sem mæta til leiks í Síkið á föstudaginn og etja kappi við Stólana. Leikurinn hefst lögum samkvæmt kl. 19:15 en þeir allra hörðustu mæta væntanlega í burgerinn um hálf sjö. Reyndar eru planaðir þrír heimaleikir nú næstu þrjá föstudaga. Viku eftir að Þórsarar mæta kemur Stjarnan í heimsókn 13. september og Höttur Egilsstöðum lætur sverfa til stáls í Síkinu þann 20. september. Nokkrum dögum síðar fara Stólarnir síðan austur á Hérað. Mótið hefst síðan í byrjun október með leik gegn Vesturbæingum sem hafa nú skilað sér aftur upp í deild þeirra bestu.
Eru æfingar komnar á fullt og þjálfarinn sáttur með hópinn? „Við erum að æfa á fullu en eins og er er liðið komið stutt á veg. Erlendu leikmennirnir eru nýlentir og næstu vikur fara í að koma mönnum í betra form og slípa liðið saman.“
Ertu spenntur að sjá liðið á föstudaginn gegn Þór, er eitthvað að marka fyrstu æfingaleiki að hausti? „Ég er alltaf spenntur þegar það er stutt í nýtt tímabil og æfingaleikir eru mikilvægur partur af undirbúningnum. Það verður fínt að sjá hvar við stöndum á þessum tímapunkti og ég hlakka til að fá svör við ákveðnum spurningum sem ég er með í kollinum. Úrslitin sem slík skipta litlu máli.“
Hvað stóð upp úr að þínu mati í körfunni á Ólympíuleikunum í sumar? „Það sem stóð upp úr á Ólympíuleikunum að mínu mati var hvað mörg lönd eru farin að nálgast Bandaríkin. Ofurlið bandaríkjanna var stálheppið að fara með sigur af hólmi þrátt fyrir að allar súperstjörnurnar væru með,“ segir Benni að lokum.
Það mátti lesa í aflafréttum Feykis að þú sért farinn að mæta í hafnarhúsið í kaffi. Eru sjóarar og hafnarstarfsmenn búnir að leggja þér lífsreglurnar og fara yfir málin? „Hahaha, ég hef mætt einu sinni í föstudagskaffi út á höfn og fékk þessar fínu vöfflur. Það var vissulega farið yfir málin en það var margt annað rætt en körfubolti. Eflaust verður hann meira ræddur þegar tímabilið er farið af stað,“ segir Benni léttur að lokum.
Fleiri fréttir
-
30 milljónir settar í undirbúning fyrir Fljótagöng
feykir.is Skagafjörður 16.09.2024 kl. 09.23Stjórnvöld hafa ákveðið að flýta rannsóknum fyrir jarðgöng úr Fljótum og til Siglufjarðar og er nú stefnt að því að borun fyrir jarðgöng geti hafist árið 2026. Þrjátíu milljónum verður varið í að undirbúa gerð jarðganga úr Skagafirði í Fjallabyggð sem myndi leysa af hólmi veg um Almenninga en hann hefur farið illa í veðrum og jarðhreyfingum undanfarin ár og er talinn hættulegur vegfarendum.Meira -
Kormákur/Hvöt hélt sæti sínu í 2. deild þrátt fyrir tap í lokaumferðinni
feykir.is Austur-Húnavatnssýsla, Íþróttir, Vestur-Húnavatnssýsla 15.09.2024 kl. 19.07Það var hart barist í síðustu umferð 2. deildarinnar í tuðrusparkinu í gær. Hvorki hafði gengið né rekið hjá Kormáki/Hvöt í síðustu leikjum og útlitið ekki verulega gott fyrir lokaleikinn; erfiður andstæðingur í Ólafsvík á meðan lið KF spilaði heima á Ólafsfirði gegn Hetti/Huginn sem hafði tapað fimm leikjum í röð og virtust hættir þetta sumarið. Það eina sem spilaði með Húnvetningum var að þeir höfðu stigi meira en lið KF fyrir síðustu umferðina og það reyndist heldur betur mikilvægt þar sem bæði lið töpuðu og bættu því ekki við stigasafnið. Kormákur/Hvöt náði því í raun þeim frábæra árangri að halda sæti sínu í 2. deild og það voru víst ekki margir sem veðjuðu á það fyrir mót.Meira -
Stólastúlkum mistókst að stela sjöunda sætinu af Stjörnunni
feykir.is Skagafjörður, Íþróttir 15.09.2024 kl. 18.57Stólastúlkur spiluðu síðasta leik sinn í Bestu deildinni þetta sumarið í gær þegar þær heimsóttu Stjörnuna í Garðabæinn í úrslitakeppni neðri liða. Bæði lið voru örugg með sitt sæti í deildinni en Donni vildi sjá sitt lið sækja til sigurs og ræna sjöunda sætinu af Stjörnunni og vinna Forsetabikarinn. Tindastóll þurfti að vinna leikinn með þriggja marka mun til þess að svo gæti orðið en það hafðist ekki í þetta skiptið. Lokatölur 2-1 fyrir Stjörnuna.Meira -
Yrði mjög spenntur ef von væri á nýrri bók eftir Hannes Pétursson
feykir.is Skagafjörður, Listir og menning, Lokað efni 15.09.2024 kl. 12.35Það dugar ekki að slugsa með Bók-haldið og að þessu sinni er það skáldið góða, Gyrðir Elíasson, sem segir lesendum Feykis frá sambandi sínu við bækur, fyrr og nú. Gyrðir er fæddur í Reykjavík árið 1961 en ólst upp á Hólmagrund 8 á Sauðárkróki. Hann er giftur og á þrjár dætur, starfar sem rithöfundur og myndlistamaður. Þessa dagana er hann að vinna að bók með þýðingum á ljóðum norska skáldsins Olav H. Hauge.Meira -
Byrjaði aftur á fullu þegar ömmustrákurinn fæddist
feykir.is Skagafjörður, Austur-Húnavatnssýsla, Lokað efni, Handverk 14.09.2024 kl. 11.41Hulda Björg er fædd og uppalin á Króknum og býr í Barmahlíðinni. Hulda og Konni maðurinn hennar eiga fimm börn og eitt barnabarn. Hulda starfar sem starfsmannastjóri hjá FISK Seafood.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.