Matgæðingar

Matgæðingar vikunnar í tbl. 15, 2023, voru Hekla Eir Bergsdóttir, aðflutt að sunnan, og Óli Björn Pétursson, fæddur og uppalinn á Sauðárkróki. Þau eru bæði mjólkurfræðimenntuð og starfa í mjólkursamlagi KS, Hekla sem gæðastjóri og Óli Björn sem aðstoðar framleiðslustjóri. Þau eiga saman tvö börn, Birni Helga, fæddan 2020 og Kristínu Petru, fædd 2023.

Matgæðingar vikunnar í tbl 14, 2023, voru Davíð Már Sigurðsson, kokkur á Drangey SK 2 og myndasmiður, og konan hans Katrín Ingólfsdóttir, grunnskólakennari í Árskóla. Þau búa í Barmahlíðinni á Sauðárkróki og eiga saman fjögur börn, Rakel Sif, Viktor Smára, Daníel Frey og Kötlu Maríu. „Það er fátt betra en íslenski þorskurinn og er aðalrétturinn þorskhnakkar með chili og hvítlauk. Svo er gott að fá sér í eftirrétt einfalda og góða súkkulaðimús með rjóma og berjum,“ segir Davíð

Matgæðingar vikunnar í tbl 13, 2023 voru Magnús Freyr Gíslason, arkitekt hjá Verkfræðistofunni Stoð ehf. og húsgagnasmiður, og Kolbrún Dögg Sigurðardóttir, kennari í Árskóla. Þau búa í Barmahlíðinni á Króknum og eiga saman þrjú börn, Kötlu, Hinrik og Jöklu. Maggi og Kolbrún áttu einnig veitingastaðinn Sauðá þegar þessi matgæðingaþáttur fór í birtingu en hann er staðsettur í brekkunni við hliðina á FNV. „Eftir þennann djúpa þrist frá Pavel ákvað ég að fara í öruggt tveggja stiga layup með þessum tveim réttum,“ segir Maggi.

Matgæðingar vikunnar í tbl 12, 2023, eru Króksararnir Sigurveig Anna Gunnarsdóttir og kærastinn hennar Ingi Sveinn Jóhannesson. Sigurveig er dóttir Guðnýjar og Gunna Gests og Ingi Sveinn er sonur Fríðu og Jóa á Gauksstöðum. Þau búa saman í London þar sem Sigurveig er að gera góða hluti sem tískuljósmyndari. „Við erum matarfólk og finnst fátt skemmtilegra en að elda,“ segir Sigurveig.

Matgæðingar vikunnar í tbl 11, 2023, voru Pavel Ermolinski og konan hans Ragna Margrét Brynjarsdóttir en á þeim tíma voru þau nýflutt á Sauðárkrók úr Reykjavík. Pavel tók þá við þjálfun á karlaliði Tindastóls í körfubolta og Ragna Margrét starfaði þá sem verkefnastjóri hjá sálfræðideild Háskóla Reykjavíkur. Þau eiga saman tvo drengi, Emil, sem er þriggja ára og Anton sem verður eins árs á þessu ári. „Ég þakka fyrir áskorunina. Ég legg allt undir þegar ég fer í eldhúsið. Skil ekkert eftir á gólfinu, fyrir utan allt ruslið,“ segir Pavel. 

Matgæðingar vikunnar í tbl 9, 2023, eru Skagfirðingarnir Margrét Helga Hallsdóttir og Helgi Freyr Margeirsson. Margrét vinnur í Fjölbrautaskóla Norðurlands vestra og Helgi í útibúi Landsbankans á Króknum auk þess sem hann er þjálfari meistaraflokks kvenna í körfunni ásamt ýmsu öðru. Þau eiga saman þrjú börn, Hall Atla, Maríu Hrönn og Hólmar Daða.

Það er Edda Hlíf Hlífarsdóttir sem var matgæðingur í tbl. 8 á þessu ári en hún fékk áskorun frá systur sinni Þyrey Hlífarsdóttur að taka við þættinum á eftir sér. Edda er fædd og uppalin í Víðiholti í Skagafirði og starfar sem prestur í Húnavatnsprestakalli. Edda er búsett á Blönduósi og er unnusti hennar, Þráinn Víkingur Ragnarsson verkfræðingur, búsettur í Austur-Landeyjum, þar sem þau reka hrossaræktarbú.

Matgæðingur vikunnar í tbl. 7 á þessu ári var Dagný Huld Gunnarsdóttir í Iðutúninu á Króknum. Dagný er gift Hirti Elefssen og eiga þau saman fjögur börn. Dagný vinnur á leikskólanum Ársölum og Hjörtur á Vélaverkstæði KS. „Takk kærlega fyrir Sigrún að skora á mig. Þú hefðir nú heldur átt að skora á hann Hjört þar sem hann er snillingur í eldhúsinu. En þessar uppskriftir eru í miklu uppáhaldi hjá okkur, njótið.“

Matgæðingar vikunnar í tbl. 6 voru Þyrey Hlífarsdóttir og Dagur Þór Baldvinsson í Víðiholti. Þau eiga þrjú börn, Evu Rún, Hlífar Óla og Baldvin Orra. Þyrey og Dagur eru bæði Skagfirðingar, Þyrey frá Víðiholti og Dagur frá Sauðárkróki. Þyrey er kennari í Varmahlíðarskóla og Dagur er hafnarstjóri Skagafjarðarhafna. Á þeirra heimili er mikið eldað af mat og höfum við gaman af því að halda matarboð og fá fjölskyldu og vini til okkar í mat. „Ef ég myndi segja að við hjónin værum jafn dugleg að elda þá væri það bara alls ekki satt. Við getum orðað það þannig að annað okkar er meira fyrir að elda matinn og hitt gerir meira af því að borða matinn,“ segir Þyrey.

Sigrún Elva Benediktsdóttir var matgæðingur í tbl 5 á þess ári og er Sigrún fædd og uppalin á Sauðárkróki en flutti heim í fyrra sumar eftir að hafa búið síðustu tíu ár í Svíþjóð þar sem hún kynntist barnsföður sínum, Shaher, sem kemur frá Sýrlandi og eiga þau saman tvo stráka.